Ish-kryeministri Berisha është i shqetësuar për të ardhmen që e pret. Pas shpalljes “non grata” nga DASH, Berisha ka treguar se do i shkojë deri në fund misionit të tij, e ndërsa ka shpërndarë një video, për të demostruar se ka mbajtur gjithmonë një qëndrim pro SHBA-së.
“25 vjet me pare, ish Presidenti George H. W. Bush dhe ish Zonja e pare Barbara Bush dhe e gjithe familja e tij te madhe se bashku me ish Sekretarin e Shtetit, Colin Powell dhe zonjen Alma Powell erdhen per nje vizite miqesore ne Vlore. Kete vizite e ka perjetesuar shume bukur ne memorjet e saj ish Zonja e pare Barbara Bush. Sb”, shkruan Berisha bashkëngjitur videos në fjalë.
Lëvizjet e Berishës vijnë pas mesazheve të forta të ambasadores Yuri Kim. Kjo e fundit dha një sinjal të fortë për liderin historik të kësaj force politike, duke i vënë ultimatum Bashës. Ajo u shpreh se Partia Demokratike duhet ta mendojë mirë, pasi një parti s’mund të hajë bar për hir të një deputeti, duke mos e përmendur me emër ish-kryeministrin.
Lideri historik i Partisë Demokratike u zotua 24 orë pas qëndrimeve të forta të ambasadores amerikane Yuri Kim, se në shtator do të ngjisë sërish shkallët e Parlamentit si deputet dhe do të jetë pjesë e grupit parlamentar të PD.
Berisha e akuzoi Yuri Kim se po sillet si guvernatore, dhe deklaratat e saj si më të rëndat e tre dekadave të fundit. Ai zbuloi për mediat se në Gjykatën Franceze është dorëzuar padia e tij për shpifje ndaj sekretarit të Shtetit, Blinken. /Tirana Today
