Një aksident i rëndë ka ndodhur sot në qendër të qytetit të Gjilanit, ku ka mbetur një i vdekur dhe janë plagosur rreth 20 të tjera.
Ngjarja ndodhi pasi një kamion transportues ka pasur probleme me frenat, siç duket edhe në video, duke marrë para këmbësore dhe jo vetëm.
Zëdhënësi i Policisë për rajonin e Gjilanit, Ismet Hashani ka thënë se dyshohet që ngjarja të ketë ndodhur aksidentalisht. Ndërkaq, Nisret Hajrullahu, drejtor i Emergjencës në Gjilan, tha se janë duke trajtuar të plagosurit nga ky aksident.
“Nga aksidenti që ka ndodhur në orët e pasdites, shumë të lënduar janë sjellë në emergjencë. Ende nuk dihet numri i saktë i të lënduarve”, tha Hajrullahu. Kryetari i Komunës së Gjilanit, Lutfi Haziri, ka thënë përmes një postimi në Facebook, se “sipas informatave të para, kamionit nuk i kanë funksionuar frenat” dhe shtoi se përveç dëmeve në njerëz, në këtë aksident janë përfshirë edhe dhjetëra vetura dhe ka dëmtim të pronës publike.
