Ish-punonjësit e Kombinatit të Përpunimit të Naftës në Ballsh janë ngritur në një protestë, e cila është mbajtur para dyerve të kësaj uzine. Sokol Dautaj, i cili është kreu i sindikatës së naftëtarëve tha se kanë informacione se rafineria e Ballshit, do të çmontohet dhe do të shkojë për skrap. Nëse do të ketë një vendimarrje të tillë, punonjësit i mëshojnë fort faktit se nuk do ta lejojnë.
Ata janë të vendosur, duke thonë se pa u likuiduar të gjithë me pagat e prapambetura, në rafineri do të futen vetëm mbi trupat e tyre. Ministrja e Infrastrukturës, Belinda Balluku, deklaroi më herët se naftëtarët do të paguhen me 30 mijë lekë në muaj edhe për dy vitet në vijim.
“Deri sa të shlyhen një më një naftëtarët, nuk shkel njeri këtu. Vetëm mbi trupin tonë futen këtu. Boll kemi bërë negociata. Nëse duan që palët të zhdukin gjurmët e krimit, të bëjnë hesapet e tyre.
Deri sa të likujdohen të gjithë naftëtarët, kjo rafineri do bëhet skrap nga ata dhe jo nga të tjerët. Jemi informuar që ka kaluar një mbështetje financiare, nuk është zbardhur asgjë në fletoren zyrtare. Por ne jemi të shqetësuar nga disa zëra që qarkullojnë. Kjo rafineri është e naftëtarëve.
Kemi ndenjur pa u paguar për 13 muaj. Me pak investime, kjo rafineri kthehet në punë, pse nuk e vënë në punë?”, deklaroi Sokol Dautaj, kreu i sindikatës së naftëtarëve.
