Ekspertiza paraprake e mjekësisë ligjore për trupin e pajetë të 30-vjeçares Anisa Josifi, ka zbuluar se ajo ka ndërruar jetë 15 muaj më parë. Dëshmi tronditëse vijnë për tragjedinë që ka ndodhur në Kombinat, që kalon kufijtë e imagjinatës.
Sipas ekspertëve, trupi është mumifikuar, sepse është mbështjellë ditë pas dite me çarçafë të hollë, raporton “BalkanWeb”. Këtë e ka konfirmuar dhe vajza tjetër, 34-vjeçarja Blerta Josifi e cila ndodhet në spital.
Blerta ka deklaruar se ajo dhe nëna kanë refuzuar çdo gjë, ushqim, ujë etj për 40 ditë. “Nëna vdiq, unë mbijetova”, i tha policisë 34-vjeçarja. Policia hyri nga dritarja e tualetit ditën e djeshme në banesën e tyre, sepse ballkoni ishte mbyllur me kangjella hekuri.
Në media është publikuar edhe fotoja ku shihen nëna, Zhaneta Josifi, bashkë me dy vajzat e saj, Anisa dhe Blerta, 30 dhe 34 vjeçe. Viktimat praktikonin format më ekstreme të besimit si “Dëshmitare të Jehovait”.
Nëna dhe vajzat kishin shmangur kontaktet me banorët e tjerë të pallatit, ndërsa ka qenë era e rëndë që shpërndahej në pallat për shkak të dekompozimit të trupit të Anisa Josifit, gjë e cila ka alarmuar banorët.
Nëna dhe motra e viktimës i lyenin trupin me vaj ulliri dhe uthull për të ngadalësuar procesin e dekompozimit, duke pritur kështu ringjalljen e saj. Ekspertët kanë konstatuar paraprakisht shenja mumifikimi në trup, për shkak të vajit të ullirit dhe uthullës, ndërsa fillimisht ajo ishte mbështjellë me çarçafë. Ato e kishin mbuluar trupin e Anisës me shumë jorganë dhe batanije, me qëllim që të mos shpërndahej era e rëndë e dekompozimit. Gratë thuajse nuk kishin kontakt me askënd në pallat, duke qendruar brenda në shtëpi, gjë e cila ka shqetësuar vëllain e Zhanetës, i cili kishte tentuar të kontaktonte në mënyrë të vazhdueshme.
