Ministrja e Arsimit, Besa Shahini është shprehur se janë identifikuar të gjitha shkollat që kanë pasur dëme si pasojë e tërmetit të 26 nëntorit.
Gjatë fjalës së saj në mbledhjen e jashtëzakonshme të qeverisë, Shahini tha se në qarkun e Durrësit, Tiranës dhe Lezhës, shkolla nuk do të fillojë të hënën. Sipas saj, disa shkolla në këto vende kanë ende nevojë për disa rregullime.
Shahini shtoi se ministria ka 2 opsione për kohën se kur do të nisë procesi mësimor, duke mos dhënë më detaje të tjera.
“Ka nevoje per pak kohe per riparimin e shkollave, është identifikuar numri i atyre institucioneve që kanë pasur dëme. Në 26 nëntor drejtorët e shkollave apo dhe të drejtorive Arsimore kanë identifikuar numrin e shkollave e që kanë paraqitur ndonjë shqetësim. Më 27 nëntor inspektorët kanë bërë inspektime dhe më 28-29 inxhinierë nga Kosova kanë inspektuar shkolla, Në Tiranë, Durrës Lezhë. Më 30 nëntor kemi bërë analizën mbi situatën në fjalë. Nuk mendoj se në Durrës se në qarkun Durrës është koha që të fillojmë të hënën. Edhe Tirana dhe Lezha kanë nevojë për disa rregullime. Kemi dy opsione për nisjen e procesit të shkollës”, tha ajo.
