Policia e Shtetit ka njoftuar se pas orës 13:00 të kësaj të shtune e deri në orën 05:00 të së hënës, do të lejohet qarkullimi i transportit të mallrave, produkteve ushqimore dhe fruta-perimeve nga tregjet e shumicës për të furnizuar marketet dhe minimarketet. Por policia sqaron se çfarëdo lloj dyqani do të jetë i mbyllur në oraret kufizuese, dhe nuk do të lejohet shitja.
Referuar rasteve kur qytetarët kanë një emergjencë shëndetësore, për ta janë në shërbim dy numra. Burimet zyrtare të policisë njoftojnë më tej se për të gjithë ata që kanë një emergjencë shëndetësore, duhet të njoftojnë 112 dhe 129, duke dhënë arsyen e lëvizjes dhe itinerarin, targën e automjetet dhe të personit që do shkojë në spital për ndihmë mjekësore.
Pak më herët, kreu i qeverisë Edi Rama paralajmëroi se do të përgjigjen me të keq për gjithë ata që nuk marrin vesh, duke kujtuar se në Itali po vdes një njeri çdo dy minuta. Kryeministri ka folur për ndëshkim të tradhtarëve, për të gjithë ata që thyejnë ligjin e luftës.
Njoftimi
Policia e Shtetit
Nisur nga pyetjet e shumta drejtuar Policisë së Shtetit nëpërmjet adresave zyrtare të vëna në dispozicion të qytetarëve, sqarojmë se:
Lejohet qarkullimi i automjeteve të transportit të mallrave, produkteve ushqimore dhe fruta-perime, nga tregjet e shumicës për të furnizuar marketet dhe minimarketet, por NUK lejohet shitja në minimarket, marketet e çdo dyqan me pakicë e shumicë, në oraret kufizuese të publikuara.
Për të gjithë ata që kanë një emergjencë shëndetësore, duhet të njoftojnë 112 dhe 129 duke dhënë arsyen e lëvizjes dhe itinerarin, targën e automjetet dhe të personit që do shkojë në spital për ndihmë mjekësore.
