Kryetarja e LSI-së Monika Kryemadhi në nismën për të takuar qytetarët në çdo qytet dhe ti ftojë ata në protestën e madhe të 16 shkurtit, po zhvillon një takim me qytetarët në Fushë-Krujë.
Gjatë takimit, Kryemadhi u shpreh se djegia e mandateve ishte një veprim ekstrem, por i detyrueshëm në një vend që po shkon drejt diktaturës. Kryetarja e LSI-së, përballë qytetarëve të Fushë-Krujës tha se ndihet në borxh ndaj tyre.
“Nuk di ku ta nis, në fakt LSI ka nisur një rikostrukturim total. Ne kemi disa borxhe për burrat dhe gratë e Fushë-Krujës. Do ta shlyejmë borxhin ndaj jush edhe me kamatë. Historikisht djemtë dhe gratë e Fushë-Krujës kanë qenë në themelimin e LSI-së, që sot janë bërë burra dhe gra. Kemi një detyrim moral për t’u takuar dhe biseduar.
Në radhë të parë fillojmë këtë bashkëbisedim me ju, për problemet që kemi. Ne dogjëm mandatet, një veprim ekstrem por i domosdoshëm dhe i detyrueshëm në vend që po shkon drejt diktaturës. Djegia e mandateve për hir të së vërtetës ishte një nga veprimet më të rëndësishme. Edhe kur është krijuar LSI-ja, qëllimi kryesor ishte integrimi i vendit në BE”, tha Kryemadhi.
