Vendet nga mbarë bota kanë filluar të lehtësojnë masat kufizuese të vendosura për të frenuar përhapjen e koronavirusit.
Mirëpo, kjo rihapje nuk ka rezultuar efektive për të gjitha vendet. Kjo pasi Irani është bërë vendi i parë në botë që ka raportuar se vendi është përfshirë nga një valë e dytë e infeksioneve.
Mediat e huaja raportojnë se Irani ka regjistruar ditën e mërkurë një numër rekord të rasteve të reja, plot 3,574. Ndërkohë që numri më i madh i rasteve gjatë valës së parë ishte 3.186, të regjistruara më 30 mars.
Vendi i Lindjes së Mesme iu nënshtrua masave kufizuese që prej muajit shkurt. Irani pa një zbutje të situatës në muajin prill dhe prej pak kohësh kishte filluar të lehtësonte masat e bllokimit.
Rritjet e rasteve u regjistruan përsëri në fillim të muajit maj, ndërsa vendi tani ka raportuar për tre ditë me radhë mbi 3,000 të infektuar.
Me më shumë se 167 mijë raste të konfirmuara dhe 8,134 viktima, Irani renditet në vendin e njëmbëdhjetë në listën e vendeve më të prekura nga koronavirusi.
COVID-19 ka prekur më shumë se 6,7 milionë njerëz nga e gjithë bota, ndërsa i ka marrë jetën mbi 393 mijë personave.
