Brazili dalëngadalë po shndërrohet në epiqendrën e re të koronavirusit.
Ndërkohë Presidenti i vendit Jair Bolsonaro vijon të neglizhojë kërcënimin që vjen nga COVID-19, teksa herë pas here në daljet e tij publike i mëshon faktit se është vetëm një “grip i lehtë” dhe se nuk ka nevojë për kufizime të ashpra.
Shumë spitale në Brazil kanë arritur maksimumin e kapaciteteve të tyre, duke hyrë kështu në fazën e kolapsit.
Thuhet se janë të shumtë personat që në pamundësi të një kujdesi në ambiente spitalore, kanë ndërruar jetë në shtëpitë e tyre.
“Ne kemi të gjitha kushtet këtu që pandemia të bëhet shumë më serioze”, tha Paulo Brandao, një virolog në Universitetin e Sao Paulo.
Brazili zyrtarisht ka raportuar rreth 4500 vdekje dhe rreth 67,000 raste të konfirmuara, mirëpo numrat e vërtetë atje, besohet të jenë shumë më të lartë.
Disa shkencëtarë u shprehën se mbi 1 milion persona mund të jenë infektuar në Brazil.
Të dielën u zbuluan 4,613 raste të reja, që ishte rritja e dytë më e madhe ditore që nga fillimi i shpërthimit të pandemisë.
Sakaq, Presidenti i Brazilit thekson se njerëzit duhet të vazhdojnë jetën e tyre, për të parandaluar një rënie ekonomike.
Kujtojmë se në mes të prillit, Bolsonaro shkarkoi Ministrin e Shëndetësisë, pas një seri mosmarrëveshjesh rreth përpjekjeve për të kontrolluar përhapjen e koronavirusit.
