Pas përfundimit të mbledhjes në Kryeministri, Ministri i Brendshëm, Bledi Çuçi ka folur rreth dorëheqjes së Ardi Veliut dhe emërimit në krye të Policisë së Shtetit të Gledis Nanos. Ministri tha se ka vlerësimin maksimal për punën e Ardi Veliut, marrë shkas nga deklarata e tij një ditë më parë ku tha se ai do shkarkohej kur t’i mbaronte kandili. Lidhur me këtë deklaratë, Çuçi u shfajësua duke thënë se është keqkuptuar, pasi ishte një retorikë e përdorur vetëm me opozitën në Komisionin e Sigurisë.
“Veliu largohet me rezultate shumë të larta në nivele si asnjë herë tjetër përformancën e Policisë së Shtetit. Kjo fal përgjegjshmërisë në këto 4 vite. Të gjithë treguesit flasin për një rritje të standardit të performances”.
“Pjesën e kandilit e keni keqkuptuar. Se janë situata në dinamikë komunikimi me opozitën në Komision. Kam vlerësim maksimal për Veliun. Është përgjysmuar numri i vrasjeve. Operacioni OFL. Performanca dhe besueshmëria që është në 65% sot.
Për 100 ditëshin do ketë edhe 300 dhe vendosim objektiva dhe gjithmonë vendosim ta përmirësojmë. Sjellim një energji të re për të realizuar objektivat dhe angazhimin në mandatin e tretë”, tha ai.
Gledis Nano është emëruar zyrtarisht Drejtori i ri i Përgjithshëm i Policisë së Shtetit, pas dorëheqjes së Ardi Veliut nga ky post një ditë më parë. Gledis Nano u propozua nga Ministri i Brendshëm Bledi Çuçi, për postin e drejtorit të Policisë së Shtetit dhe u firmos nga zv/Kryeministri Arben Ahmetaj në mungesë të kryeministrit Edi Rama.
