Aktivisti Besjan Pesha, përmes një postimi në rrjetin e tij social ‘Facebook’ ka denoncuar përdorimin e fotos së djalit të tij, gjatë mitingut ku kryebashkiaku Veliaj konfirmoi rikandidimin e tij në zgjedhjet lokale të 30 qershorit.
Sipas tij, fotografia është shkrepur në vitin 2015, kur i biri mbolli një rrënjë ulliri me rastin e ditës së pavarësisë, ndërsa e njëjta foto është shfaqur në ekranin gjigand tek sheshi ‘Nënë Tereza’.
“Duhet të jesh shumë pervers që të rrëmosh arkivat personale të dikujt dhe të grabisësh prej aty fotot e fëmijës. Duhet të jesh sëmurë që më pas këto imazhe ti përdorësh si fasadë për qëllime elektorale. Duhet të jesh kleptoman që të mos mjaftohesh me vjedhjen e fondeve publike”, shkruan Pesha.
Ndërkohë, aktivisti paralajmëron se çështja do të shkojë në gjykatë, pasi fotografia e të birit është përdorur pa lejen e tij.
