Kryetari i Bashkisë së Tiranës, Erion Veliaj ka folur në Kongresin e Partisë Socialiste, ku e ka nisur fjalën me një thumbim për opozitën e bashkuar.
“Kjo është Tirana jonë, Tirana qytetare. Ashtu siç thonë tironsit, kush na ka inat, kshu na paftë përnatë! Ju falënderoj nga zemra, nënën time dhe gruan time për mbështetjen.
Ne bëjmë një kontrast të jashtëzakonshëm me të tjerët, shikoj që keni ardhur me familjet tuaja. Nëse një njeri bind familjen e vet, ajo familje bind shkallën, nëse bind shkallën, bind lagjen, nëse bind lagjen, bind qytetin. Falënderoj veçanërisht demokratët që kanë ardhur, e ndjej zhgënjimin tuaj në nja parti të tillë, e ndjej zhgënjimin që ajo parti ju ka hequr nga puna. Nën qeverisjen e PS shteti bëhet më i mirë, drejtësi më e fortë, mirë se erdhët në familjen tonë”, tha Veliaj, i cili do të shpallë kandidaturën për një mandat të ri si kryetar bashkie.
Veliaj iu përgjigj edhe zërave për një prishje të marrëdhënies mes Ramës dhe tij, teksa tha se ata janë më të bashkuar se kurrë dhe të vendosur për ta çuar përpara Tiranën dhe Shqipërinë:
“Ka pasur një diversion nga kundërshtarët tanë para se të kryenin vetëvrasjen se unë dhe Edi Rama nuk i kemi punët mirë. Dëshpërimi duhet të jetë aq i madh sa e vetmja shpresë është që të zihen me ne. Më vjen keq t’ju zhgënjej por unë dhe Edi Rama jemi më bashkë se kurrë, më pranë se kurrë me ambiciet tona që të çojmë përpara Tirana por edhe Shqipërinë”./ Tirana Today
