Mediat në Kosovë kanë shpërthyer në revoltë të hapur, pas një komenti në gjuhën serbe i shkëmbyer mes Vedat Muriqit dhe mesfushorit Milinkoviç-Saviç.
Sulmuesi i përfaqësuese dardane, u aktivizua rreth 25 minuta para fundit në sfidën ndaj Napolit, ku Lacio triumfoi me rezultatin 2-0.
Mjaft entuziast nga fitorja e arritur, Muriqi ka shpërndarë 2 foto nga ndeshja në “Instagram” ku shkroi: “Jam shumë i lumtur që jam rikthyer dhe që kam kontribuuar në skuadër. Tri pikë shumë të rëndësishme. Forca shqiponja!”.
Në këtë postim ka komentuar edhe mesfushori serb Milinkoviç-Saviç që i shkroi: “Ajde srce” që në shqip do të thotë “Forca zemër”.
Sulmuesi dardan i është përgjigjur po në gjuhën serbe duke shkruar me “Ajmoooo” apo në shqip “Forcaaaa”. Kaq ka mjaftuar që të ‘tërbohen’ mediat kosovare, kjo edhe për shkak të situatës aspak të qetë që paraqitet së fundmi.
