Organizata Botërore e Shëndetësisë bëri të ditur se ndotja e ajrit vret ende 7 milionë njerëz çdo vit. Nëntë nga 10 njerëz në të gjithë botën janë të ekspozuar ndaj niveleve të larta të ndotjes që sjellin kancer dhe sëmundje kardiovaskulare, sipas raportit, që ka marrë për bazë të dhënat e fundit për ndotjen e ajrit në të gjithë botën.
Sipas institucionit të shëndetësisë, thuajse 25% e vdekjeve nga sëmundjet e zemrës, trompoza dhe kanceri i mushkërive, lidhen me ndotjen e ajrit.
Niveli më i lartë i ndotjes është regjistruar në vendet e Lindjes së Mesme dhe Azinë Juglindore, ku në disa zona, toksinat ajrore kalojnë 5 herë limitin e Organizatës Botërore të Shëndetësisë.
Këto shifra kanë mbetur të pandryshuara në vitet e fundit. Megjithatë, nuk është vetëm ajri në qytetet e ndotura që përbën rrezik ndaj shëndetit publik.
Sipas agjencisë, thuajse 3 miliardë njerëz janë ekspozuar nga ndotja në ambientet e mbyllura, ndërkohë që shumë njerëz vazhdojnë të gatuajnë me lëndë djegëse të ngurta dhe vajguri, në vend të alternativave më të pastra si gazi apo energjia elektrike.
Ndotja në ambiente të mbyllura shkaktoi vdekjen e 3.8 milionë njerëzve në vitin 2016.
Në qytetet e vendeve të pasura të Evropës, ajri i ndotur është përkthyer në jetëgjatësi më të ulët. Të dhënat më të fundit të OBSH për cilësinë e ajrit, mbulojnë më shumë se 4300 qytete në 108 vende të botës, duke treguar se përqendrimi i pjesëzave të dëmshme që njihen si PM10 dhe PM2.5 është i lartë. PM 2.5 përfshin ndotës si sulfati, nitrati dhe qymyri i zi, që përbën edhe rrezikun më të madh për shëndetin e njeriut. WHO këshillon vendet të reduktojnë ndotjen e ajrit në vlera prej 20 mikrogramësh për metër kub për PM10 dhe 10 mikrogramë për metër kub për PM 2.5.
Të dhënat tregojnë se shumica e kryeqyteteve evropiane po dështojnë në arritjen e këtyre nivele të rekomanduara. Talin në Estoni, Stokholmi në Suedi dhe Dublini në Irlandë kanë regjistruar disa nga rezultatet më të mira, ndërsa Ankaraja në Turqi, Shkupi në Maqedoni dhe Tbilisti në Gjeorgji, janë qytetet që gjenden më larg objektivave. Kryeqyteti shqiptar, Tirana, sipas të dhënave të OBSH, është një qytet i ndotur, por pozicionohet në mesin e renditjes në një nivel me qytete si Zagrebi, Budapesti, Vilniusi, Varshava, Bukureshti, Moska etj.
