Pa bërë publik më herët se do të mbante një takim me kryedemokratin Basha, presidenti Meta ka zbardhur temën e diskutimit mes palëve. Ky takim ka ardhur pas kërkesës së Kreut të Shtetit, Ilir Meta, ku e ka siguruar se do të dekretojë ndryshimet e Kodit Zgjedhor në respekt të Marrëveshjes konsensuale të 5 qershorit.
Ndër të tjera, Meta thotë se i ka shprehur falenderimet Bashës, për kontributin në arritjen e Marrëveshjes së 5 qershorit, ndërsa i ka kërkuar të vazhdojë punën në Këshillin Politik pa rënë pre e asnjë provokimi.
“Sapo përfundova një takim me kërkesën time me Kryetarin e Partisë Demokratike dhe liderin e Opozitës së Bashkuar z.Lulzim Basha. E sigurova se do të dekretoj menjëherë ndryshimet e Kodit Zgjedhor në respekt të Marrëveshjes konsensuale të 5 qershorit. E falenderova për kontributin konstruktiv në arritjen e Marrëveshjes së 5 qershorit dhe i kërkova të vazhdojnë punën në Këshillin Politik në frymën e konsensusit duke mos rënë pre e asnjë provokimi. Inkurajova vijimin e bashkëpunimit të ngushtë me të gjithë partnerët e investuar për çeljen sa më parë të negociatave të anëtarësimit të Shqipërisë me Bashkimin Europian dhe që kanë mbështetur Këshillin Politik në frymën e konsensusit dhe gjithëpërfshirjes”.
