Kreu i grupit parlamentar të LSI-së, Petrit Vasili ka fshikulluar delegacionin e Parlamentit Evropian të dërguar në Tiranë për krizën politike në vend, pas dorëzimit të mandateve nga opozita dhe protestave të njëpasnjëshme të saj.
Në një deklaratë për shtyp, Vasili akuzon eurodeputetët për standarde të dyfishta, veçanërisht Knut Fleckenstein, teksa sipas tij “kanë mbyllur sytë para gjendjes së Shqipërisë”, ndryshe nga sjellja në vendin e tyre.
Vasili tha se s’mund të ketë standarde të dyfishta, ndërsa nënkupton se eurodeputetët janë të blerë me para të pista, teksa përmbyll se:
“Opozita është në rrugë, do vazhdojë të ketë një shami për të fshirë sytë e turbulluar të gjithë eurodeputetëve, të cilët e shohim që kanë pamundësi për të parë qartë për shkak të disa parave të cilat janë të gjithfarshme, por kanë vetëm një emër, janë para të pista.”
Fjala e Vasilit:
Jemi në këtë komunikim për të ndarë disa të vërteta tronditëse, që kanë rrënuar themelin e shtetit ligjor, por të dërguarit e Evropës në Tiranë, me një shikim të turbulluar nuk i panë dhe me një memorie gjithashtu të turbulluar i harruan. Është një turbullirë që nuk e dimë nga vjen, vjen nga e njëjta para problematike me të cilat qeveria ka rrëmbyer pushtetet, apo për arsye të tjera që koha do i zbardhë.
Shqipëria ka verifikuar dukshëm se vota në Shqipëri është blerë nga krimi i organizuar, ka një dosje 339 e cila mbahet e bllokuar prej 2 vitesh. Fajtorët i njeh gjithë Shqipërinë, Vagjush Dakon dhe Niçen.
Së dyti, krimi elektoral nga përgjimet e antimafias italiane, ka provuar se 20 milionë euro janë përdorur për të blerë vota në Tiranë.
Shteti ligjor është shkatërruar përballë një korrupsioni, çuditërisht nuk e shohin eurodeputetët evropianë. Unaza e Re ka kaluar kufijtë, u falsifikuar firma e sekretarit të shtetit, e di gjithë bota, nuk e shikojnë eurodeputetët. Kanë një vështrim të turbulluar! Kemi afera të tmerrshme, si tenderi në OST, miliona euro që prokuroria shqiptare nuk i ndalon dot por arrestojnë ata që protestojnë te unaza për të mbrojtur shtëpitë e tyre.
Investimi madhor i Evropës, mbi 1500 njerëz futen e konkurrojnë nga listat e partisë, por edhe këtë nuk e shikojnë eurodeputetët, nuk i dëgjojnë dhe nuk i pranojnë.
Të gjitha këto të vërteta të mëdha, opozita është e palëkundur të mos bëjë kompromis. Nëse në Evropë nuk lejohet të preket një votë, eurodeputetët thonë s’ka gjë se është mirë për Shqipërinë.
Krimi elektoral do të jetë i papranueshëm për Shqipërinë, korrupsioni siç luftohet në Gjermani, ashtu duhet të luftohet në Shqipëri. Shqipëria në BE do të thotë të ketë standarde të Bashkimit Evropian.
S’mund të ketë një standard për Shqipërinë si një vend i dorës së tretë, i përbuzur dhe një standard tjetër për vendet e tyre. Për këtë opozita është në rrugë, do vazhdojë të ketë një shami për të fshirë sytë e turbulluar të gjithë eurodeputetëve, të cilët e shohim që kanë pamundësi për të parë qartë për shkak të disa parave të cilat janë të gjithfarshme, por kanë vetëm një emër, janë para të pista./ Tirana Today
