Mjeku dhe anëtari i Komitetit Teknik të Ekspertëve, Alban Ylli deklaroi se varianti Delta është përhapur në të gjitha vendet e botës, dhe se nuk përjashtohet rikthimi i një vale të tretë. Deklarata e Yllit u bë ditën e sotme në rubrikën ”Opinion” në News24.
Sipas tij, Varianti Delta është duke u shndërruar në variant dominant dhe pritet që rastet e reja me koronavirus në vendin tonë të rriten gradualisht.
Ylli nuk e përjashtoi mundësinë për ulje të orës policore gjatë muajve të vjeshtës, në varësi kjo dhe të situatës në të cilën do të ndodhet vendi.
Alban Ylli: ”Komiteti Ekspertëve përdor informacionin më të mirë shkencor që ekziston për të bërë rekomandimet. Nuk ka dyshim që varianti delta influencon në vende të botës për rikthimin e një vale të tretë. Kjo u pa në Britani. Edhe SHBA po vijon me të njëjtën linjë. Varianti Delta është duke u shndërruar në variant dominant. Të gjitha mostrat në Gjermani u kthyen me përgjigje që ishin Delta. Ne presim që rastet të rriten gradualisht. Ka faktorë që po na mbrojnë, por ato janë më të pa sigurt. Qipro, Greqi, Azi, duket qartazi që ky variant është shkaktari kryesor i një vale infektime dhe vdekjesh.”
