Hekuran Billa po fliste në telefon me të dashurën, deri në çastin kur atij i morën jetën. E dashura e të ndjerit, Adjola Lakra, e ka qenë telefonata e fundit që 40-vjeçari ka pasur para se të ekzekutohet. 26-vjeçarja ka qenë duke folur me të në telefon, telefonatë kjo e cila ka qëndruar hapur edhe pas ekzekutimit. Ka qenë kjo një nga indiciet e policisë për të vënë 26-vjeçaren në vëzhgim dhe përgjim.
Nga hetimet ka rezultuar se vajza kishte lënë takim me 40-vjeçarin në vendin ku ky i fundit mbeti i vrarë, dhe që çon hetuesit në pistën se vajza është përdorur si “karrem” nga hasmi për t’i bërë pritë 40-vjeçarit. Lidhja e saj me Hekuran Billën kishte ndodhur rreth 1 vit më parë, sapo ai kishte dalë nga burgu i Fushë-Krujës.
Adjola Lakra pranon se është paguar
Adjola Lakra ka pranuar para policisë se është paguar nga Viktor Marku, vëllai i Prel Markut që Billa vrau në Angli në 2006, për t’i dhënë informacione mbi vendodhjen e tij, por theksoi se nuk kishte dijeni që do e vrisnin. Adjola është e njohura e Sebastian Malit, nipit të Prel Markut, bashkëpunëtor në krim, dhe ai ia ka kërkuar si nder. Por edhe duke i dhënë para që të flirtonte me Billën, për të mësuar më tepër rreth tij.