Kreu i Partisë Demokratike, Lulzim Basha, ka reaguar pas përfundimit të zgjedhjeve të Kosovës, duke u shprehur se ajo ka hapur një faqe të re në rrugëtimin e saj si shtet demokratik.
Përmes një postimi në Facebook, Basha u dërgon urimet për fitoren Albin Kurtit dhe Vjosa Osmanit, si dhe përgëzon udhëheqësit e forcave të tjera politike për ‘qëndrimet e tyre evropiane’ pas rezultatit.
Kujtojmë që procesi i numërimit në Kosovë është mbyllur, ndërsa ka mbetur i paprocesuar informacioni mbi 4% të votave të diasporës.
Deri më tani, fitues duket të jetë Lëvizja Vetëvendosje e Albin Kurtit, e pasuar nga LDK e Vjosa Selmanit, me një diferencë të ngushtë votash.
Postimi i plotë:
Kosova hapi një faqe të re në rrugëtimin e saj si shtet demokratik. Populli i Kosovës votoi për ndryshim duke mandatuar opozitën për të udhëhequr në rrugën e transformimit ekonomik dhe integrimit euro-atlantik. Urimet më të përzemërta LVV dhe LDK, Albin Kurtit dhe Vjosa Osmanit për fitoren.
Përgëzime udhëheqësve të forcave të tjera politike garuese në këto zgjedhje që me qëndrimet e tyre europiane japin garanci për ecjen përpara të Kosovës.
Dje populli i Kosovës dha një shembull frymëzues me pjesmarrjen civile dhe masive në zgjedhje, Policia e Kosovës tregoi profesionalizëm të lartë në ndalimin e menjëhershëm të atyre që cënuan sekretin e votës së lirë duke e fotografuar atë. Kosova i dëshmoi botës se është një demokraci funksionuese dhe se meriton sa më parë vendin dhe rolin e saj në të gjitha institucionet dhe proceset ndëkombëtare. Urime Kosovë!
