Ministrja e Shëndetësisë, Ogerta Manastirliu, në një prononcim për mediat tha se Urgjenca Kirurgjikale e Tiranës që ndodhet në QSUT, do të transferohet nga dita e premte në Spitalin e Traumës.
Ajo paralajmëroi ndër të tjera se ky është veçse fillimi, ndaj qytetarët duhet të zbatojnë të gjitha rregullat, për të shmangur infektimin.
Ministrja u shpreh se 27 testet e kryera në spitalin e Fierit, që iu nënshtruan mjekët dhe infermierët, rezultuan negativ.
Manastirliu deklaroi se po punohet për shtimin e respiratorëve, për të infektuarit me koronavirus. E ndërsa testimet po kryhen sipas udhëzimeve të OBSH.
“Kemi vendosur që për të lehtësuar kapacitetet e QSUT, për të krijuar zona të sigurta sanitare, për pacientët që trajtohen jo për COVID-19, shërbimi i kirurgjisë së urgjencës dhe ndërhyrjeve kirurgjikale, përkatësisht klinikat 1, 2 dhe Urologjisë do të transferohen te spitali Universitar i Traumës qysh nga dita e premte, e kësaj jave. Spitali i Traumës do të mbështetet nga kirurgët dhe anestezistët dhe radiologët”.
