Pas mbledhjes në selinë rozë me drejtuesit në qarqe, kryeminsitri Rama tha se tani është koha për të intensifikuar komunikimin me njerëzit.
I pyetur nëse është i kënaqur me punën e drejtuesve të PS në qarqe, kreu i qeverisë u shpreh se nuk është i kënaqur as me veten e tij.
“Është koha për të intensifikuar komunikimin me njerëzit, dhe punën që të vazhdojmë të përmirësojmë marrëdhëniet e pushtetit qendror dhe vendor me bazën. Unë nuk jam asnjëherë i kënaqur as me veten time, lërë më me drejtuesit politikë”, deklaroi Rama.
Sa i përket drafitit të opozitës së bashkuar për Kodin Zgjedhor, kryeministri tha se është në tagrin e grupit që merret me Reformën Zgjedhore. “Nuk jam në djeni”, ka deklaruar kreu i qeverisë.
Në mbledhjen e fundit, kryeministri Rama u dha ultimatum koordinatorëve që të zëvendësojnë çdo drejtor që nuk ka performancë të mirë.
Burime nga mbledhja e sotme thonë se është bërë e qartë agjenda që duhet të ndjekë çdo drejtues politik dhe deputet në zonat e tyre. Mbledhja është fokusuar tek çështjet organizative.
