Pas tërmetit katastrofik që shënoi 51 viktima dhe qindra të plagosur, UEFA bën thirrje të fortë për të mbështetur Shqipërinë në këtë moment të vështirë.
Gjatë ceremonisë së hedhjes së shortit për Europianin 2020, presidenti i FSHF-së, Armand Duka zhvilloi një takim me kreun e UEFA-s, Aleksandër Ceferin, me qëllim për t’i kërkuar ndihma për zonat e prekura nga tërmeti i 26 nëntorit.
UEFA është solidarizuar me situatën e vështirë që po kalon populli shqiptar.
“Jashtë futbollit, një mesazh i rëndësishëm nga Shqipëria si pasojë e ngjarjeve tragjike të kësaj jave. Të dashur miq dhe partnerë, ne ju ftojmë të ndihmoni Shqipërinë në këtë moment të vështirë”, ka shkruar UEFA.
Po ashtu, edhe ish-lojtari i Real Madridit dhe Barcelonës, Luis Figo shpërndau në faqen e tij zyrtare mesazhin e UEFA-s. Ku tregohej qartazi dhe rruga që njerëzit duhet të ndiqnin për të ndihmuar Shqipërinë.
