Kombëtarja Serbe e Futbollit është urdhëruar që të luajë ndeshjen e radhës kundër ekipit të Luksemburgut me dyer të mbyllura, për shkak të qasjes raciste të tifozëve në takimin ndaj Portugalisë, që u zhvillua muajin e kaluar në Beograd.
UEFA vendosi që Serbia duhet të luajë dy nga ndeshjet e saj të ardhshme në shtëpi pa tifozë.
“Departamenti Kontrollues, Etik dhe Disiplinor ka vendosur të urdhërojë Asociacionin serb të Futbollit të luajë dy ndeshjet e ardhshme në kuadër të garave të UEFA-s, me dyer të mbyllura”, thuhet mes të tjerash në deklaratën e Federatës Evropiane të Futbollit.
Po ashtu, Serbia është ndëshkuar edhe me 33,250 euro gjobë, për shkelje të ndryshme, përfshirë thirrje të paligjshme dhe futje në fushën e blertë.
