UEFA akuzohet të ketë ndryshuar top-formacionin e ekipit të vitit 2019, i cili zgjidhet nga tifozët që votojnë në faqen e këtij institucioni.
‘Sportsmail’ bën me dije se ky ndryshim është bërë për të nxjerrë Cristiano Ronaldon në mesin e më të mirëve. Rezultati për 11-shen e vitit u shpall ditën e djeshme, ndërsa ajo çfarë ngriti pikëpyetjet e para ishte formacioni i zgjedhur 4-2-4.
Mësohet se Ronaldo është renditur i katërti në kategorinë e sulmit pas rivalit Lionel Messi, Sadio Mane të Liverpool-it dhe Robert Lewandowski të Bayern Munich. Kjo si duket nuk i ka pëlqyer UEFA-s, e cila ka rrëzuar mesfushorin N’Golo Kante të Chelsea për të “akomoduar” Ronaldon.
Një zëdhënës i UEFA-s sugjeroi se ndryshimi u bë falë fitores së Portugalisë në finalen e Ligës së Kombeve: “Formacioni për ekipin e këtij viti u zgjodh për të pasqyruar votat e tifozëve, paralelisht me arritjet e lojtarëve në garat e UEFA-s”.
