Kreu i PD-së, Lulzim Basha shprehet se është i gatshëm të dalë në një debat me kryeministrin Rama në lidhje me situatën e krijuar në vend nga koronavirusi.
I ftuar në emisionin “Java” në RTSH, Basha thotë se Rama nuk e pranon diçka të tillë. Lideri i opozitës tha se ai ka që në vitin 2011 që e fton kreun e qeverisë në debat, por se ky i fundit e ka refuzuar.
“Zotin Rama ka që prej vitit 2011 që e ftoj në debat, por ai nuk ka pranuar. Në çdo moment jam i hapur për debat, por ai ka refuzuar të vijë në debat me mua. Po mbushet dekada e dytë që refuzon të dalë në debat. Megjithatë, dua të them diçka. Kur të vijë dita, absolutisht çdokush do të mbajë përgjegjësi për veprimet dhe mosveprimet. Pa diskutim, këtu roli i kryeministrit është kyç. Ndërkohë që gjendemi akoma në këtë situatë, mendoj që ua kemi borxh shqiptarëve që, në vend të spektaklit që mund të ofrojë një debat i dëshiruar, për te cilin shpreh gatishmërinë time në çdo moment, që energjia dhe fokusi i kryeministrit të jetë tek detyrat që duhen kryer dhe nuk po kryhen”, tha Basha.
