Mbrojtësi francez i Valencias, Eliaquim Mangala, ishte një nga lojtarët që rezultoi pozitivë me koronavirus. Në një prononcim për “L’Equipe”, 29-vjeçari tregoi trondjen e fortë kur zbuloi se ishte me koronavirus, ndërkohë që shpjegoi se nuk kishte simptoma.
Ai tha se doktori i kishte folur për karantinë, që të izolohej nga fëmijët për 14 ditë. Mangala tregon se po shmang anëtarët e tjetë të familjes, që të mos preken nga virusi.
“Bëmë disa teste të premten. Nuk kisha simptoma, isha si çdo ditë. Kur doktori më tha të dielën se isha pozitiv, u trondita. Mendova se ishte një shaka. Kur foli për karantinë, që të izolohesha nga fëmijët e mi për 14 ditë, kuptova se nuk ishte ashtu. Jam me fat, jam në karantinë në shtëpi.
Kam një shtëpi, ku familja mund të qëndrojë e izoluar. Unë jam në kat tjetër nga ata. Po e shmangim njëri-tjetrin sa më shumë që të jetë e mundur. Nuk kam simptoma, kështu që stërvitem çdo ditë. Klubi na dha një orar stërvitjeje. Unë stërvitem në kopsht me një maskë. Pastaj lexoj, shikoj fima, dokumentarë, luaj video-game”, tregoi Mangala.
