Pesë ditë pasi ishte shpallur e humbur, policia ka gjetur trupin e pajetë të aktores së famshme, Naya Rivera.
Trupi i saj iu gjet në liqenin Piru të Kalifornisë nga ekipet e kërkim-shpëtimit, aty ku edhe u pa për herë të fundit.
Aktorja amerikane u zhduk pak ditë më parë, pasi kishte marrë me qira një varkë për të shëtitur me të birin. Atë ditë vogëlushi i saj 4-vjeçar, Josey Hollis Dorsey u gjet i vetëm në varkë dhe aktorja ishte zhdukur pa lënë asnjë gjurmë.
Sipas autoriteteve, 33-vjeçarja ka mbledhur të gjithë energjinë e saj të fundit për të shtyrë lart të birin në varkë, por jo mjaftueshëm sa për të shpëtuar dhe veten.
Aktorja nuk mbante jelek shpëtimi, ndërsa mendohet se pas mbytjes, trupi i saj ka ngecur mes bimësisë së liqenit, i cili e lëshoi më vonë dhe zhytësit e gjetën duke pluskuar në sipërfaqe.
Aktorja njihet më së shumti për rolin e saj në serialin “ Glee”, i cili është rrethuar në fakt nga disa fatkeqësi. Duke nisur me vdekjen e njërit prej aktorëve kryesorë, Cory Monteith, që ndërroi jetë prej mbidozës. Ndërsa aktori tjetër, Mark Salling, vrau veten në 2018 pasi u përball me akuza për abuzime seksuale dhe posedim të përmbajtjeve pornografike me të mitur.
