Bleçar Muça, pronar i bar “Pedonale” që u ekzekutua mbrëmjen e djeshme me armë zjarri në lokalin e tij në qendër të qytetit të Lushnjes, ka qenë i ulur në tavolinë.
Për fat të keq, breshëria e plumbave kapi edhe pesë persona të tjerë. I ndjeri ka qenë i martuar me mbesën e Roland Shytit, personazh i dosjes “Hakmarrja për Drejtësi” i njohur me nofkën “Mustaqekuqi”.
Ngjarja e rëndë u shënua në orën 22:00 të mbrëmjes. Lokali në atë orë ka qenë i mbushur me klientë, e po kështu edhe rruga me qytetarë që po ktheheshin nga xhiroja e mbrëmjes.
Një makinë tip “Golf” ka ndaluar para lokalit. Një person ka zbritur duke u drejtuar për tek tavolina ku ishte ulur Muça, nën shoqërinë e disa personave të tjerë mes të cilëve kunati, Judin Velo. Vrasësi ka qëlluar me breshëri nga përtej xhamit. 40-vjeçari ka ndërruar jetë në vend.
Të plagosurit/ Emrat
Të plagosur mbetën Judin Velo, Ervis Tafa, Sara Liçi, Eksara Sauli 26 vjeç dhe Majlinda Gjyla 66 vjeçe.
Dy pistat kryesore të hetimit
Burime ende jo zyrtare thonë se autoritetet po punojnë në dy pista kryesore lidhur me shkakun pse mund të ketë ndodhur ekzekutimi.
Pista e parë është ajo e prishjes së mundshme të pazareve të drogës, ndërsa pista e dytë e hetimit është ajo e lidhjeve familjare të viktimës me Roland Shytin, anëtarin e grupit të “Hakmarrjes për Drejtësi”.
Mësohet se ndaj Muçës është qëlluar 21 herë me breshëri kallashnikovi. /TIRANA TODAY
