Kreu i Bindjes Demokratike, Astrit Patozi, ka reaguar për ndarjen nga jeta të ish-deputetit të PS, Marko Bello, si pasojë e infektimit me COVID-19. Patozi kthehet pas në kohë dhe kujton se është njohur me Bellon para se të dy të angazhoheshin me politikë.
Ndonëse të dy ishin në kahe të kundërta në politikë, kjo nuk e cënoi aspak miqësinë e konsoliduar që ata kishin krijuar me njëri-tjetrin. Përkundrazi, kjo e shtoi mirëkuptimin dhe respektin midis dy palëve.
Mjaft i prekur për ikjen e një miku të çmuar si Marko Bello, kreu i Bindjes Demokratike, Astrit Patozi na ndërgjegjëson duke na kujtuar se armiku i padukshëm është mes nesh. Ikja para kohe e tij, mund të na shërbejë si një shenjë këmbane alarmi, për ta marrë më seriozisht pandeminë.
Statusi
TRISHTIM PËR HUMBJEN E NJË MIKU TË VEÇANTË
Me Marko Bellon jemi njohur, kur asnjëri prej nesh nuk merrej me politikë, ndaj edhe nuk kishin shumë arsye për të pasur mosmarrëveshje dhe, aq më pak, për t’u grindur.
Pak vite më vonë koha apo fati na vendosi në dy anët e kundërta të barrikadës. Dhe kjo jo vetëm nuk e cënoi miqësinë, por jam i sigurt se e shtoi mirëkuptimin dhe respektin midis nesh.
Kam bindjen se merita kryesore për këtë lloj marrëdhënieje, që haset kaq rrallë në viset tona të ashpra, i takon atij.
Sot mësova me trishtim se Marko u nda nga kjo botë, pas një beteje të gjatë me armikun e padukshëm, të cilin ende një pjesë prej nesh nuk e pranojnë se ekziston.
Ndoshta ikja e parakohshme e një shqiptari të njohur dhe të mirë mund të shërbejë që kjo shoqëri ta marrë pak më seriozisht këtë pandemi të flamosur, që nuk po kursen askënd.
