Prokuroria e Tiranës, ka kërkuar dënimin me 5 vite burg për Vladimir Gjutën, personi i cili u kap duke lëvizur me armë zjarri pranë selisë së Partisë Socialiste, në kryeqytet.
Gjuta përballet me dy akuza, atë të “mbajtjes pa leje të amëve luftarake” dhe për “mbajtje pa leje të armëve të ftohta”.
Seanca e radhës, ku pritet të dëgjohen konkluzionet e mbrojtjes u caktua në 27 janar. Gjuta u arrestua në shkurt të vitit të kaluar, pasi u kap i armatosur pranë selisë së Partisë Socialiste.
Ai u pikas nga gardistët, të cilët shoqëronin kryeministrin Edi Rama dhe ministrat që ndodheshin në seli pasi po zhvillohej mbledhja e kryesisë së partisë.
Ai është një personazh i njohur për policinë dhe drejtësinë, pasi më herët është arrestuar dhe gjykuar për disa vepra penale. Gjuta u bë “i famshëm” edhe për përplasjen me ish ministrin e Brendshëm, Saimir Tahiri.
