Profesioni për të cilin u diplomua, ishte ai i një inxhinieri avionësh. Megjithatë pasioni më i madh i amerikanit Billi Hast ishin zvarranikët, dhe sidomos gjarpërinjtë. Nisi të kishte interes për ta që kur ishte 11-vjeç. Një vit më vonë do të kafshohej për herë të parë prej tyre, dhe deri në fund të jetës do të kafshohej edhe 171 herë të tjera, duke ia dalë në çdo rast të mbijetojë.
Në të paktën 20 raste, ka qenë në prag të vdekjes, por sërish ia hodhi. Mjekët besojnë se kjo ka ndodhur për shkak se nga helmimet e shpeshta, gjaku i tij ishte bërë imun ndaj helmeve të tjera. Në vitin 1947, hapi në Florida fermën e parë të zvarranikëve, të cilëve u merrte çdo ditë helmin, që ua shiste laboratorëve të ndryshëm për përdorime mjekësore apo eksperimente.
Ai merrej çdo ditë me nxjerrjen e helmit të 70-100 gjarpërinjve, nën vëzhgimin e kureshtarëve të shumtë, që paguanin një biletë për të parë shfaqjen e frikshme. Hast vlerësohet se u ka nxjerrë helmin mbi 3 milionë gjarpërinjve. Vazhdoi të punojë me ta deri në prag të 90-ave, kur për shkak të helmimeve të shumta, indet e shumë gishtave ishin shkatërruar, duke e penguar të përdorte duart normalisht. Për shkak se ishte mësuar, në vitin viti 2008, ai e porosiste vazhdimisht gruan t’i injektonte sasi të vogla helmi gjarpërinjsh. Hast mbushi 100-vjeç në dhjetorin e vitit 2010, dhe vdiq më 15 qershor 2011.
