Pas vendimit të Gjykatës së Tiranës që e shpalli fajtor për shpifje dhe fyerje ndaj ish-ministres së Arsimit Lindita Nikolla, ka reaguar ish-deputeti i PD Luçiano Boçi.
Sipas Boçit, vendimi ishte tërësisht politik, ndërsa shton se vazhdon të mendojë se ish-ministrja Nikolla nuk është thjesht dhe vetëm e paaftë, por e papërgjegjshme dhe e korruptuar.
Boçi u dënua me gjobë në vlerën 70 mijë lekë, ndërsa thotë që këtë vendim do e apelojë.
“Ne sollëm të gjitha argumentet e duhura e bindëse për çdo lexues ligji e jo më për një specialist. Vendimin do ta apelojmë.
Deri atëherë, Lindita mund të shkojë të krihet nja dy herë tek parukeri, se një e krehur aq i bën, sa gjysma e dënimit, me shpresë se do i bëjnë telefon e trysni dhe Apelit. Sa për deklarimet e mia i them dhe njëherë botërisht, me pak ndryshim. Ish Ministrja e arsimit me mesataren 5.8, nuk është thjeshtë e paaftë. Është super e paaftë”, shkruan Boçi.
Kujtojmë se ish-deputeti, denoncoi se rreth 420 mijë nxënës shqiptarë, për herë të parë në historinë e shkollës shqipe, ishin pa dëftesa shkollore, duke hedhur akuza për korrupsion ndaj ish ministres, e cila vendosi ta padiste.
