Një ngjarje e rëndë tronditi Tiranën dy javë më parë, teksa Hekuran Billa mbeti i vrarë si pasojë e një atentati mafioz, që iu bë tek zona e “Komunës së Parisit”.
Hetimet për këtë çështje vijojnë akoma, teksa së fundmi është arrestuar edhe një grua e cila akuzohet si bashkëpunëtore në vrasje.
Adjola Lakra është personi i tretë i arrestuar nga policia, lidhur me vrasjen e Hekuran Billës në Tiranë. 26-vjeçarja ka nxjerrë në pritë Hekuran Billën, duke i dhënë autorëve të dhëna të sakta për vendndodhjen e tij.
Mirëpo ajo që tërhoqi interesin publik për këtë çështje, ishte edhe lidhja që viktima kishte me këngëtarin e njohur Rigels Rajku, i njohur me emrin artistik “Noizy”.
Hekuran Billa dhe Noizy ishin miq të vjetër, ndërsa njohja e tyre datonte që para shumë vitesh kur të dy ata jetonin në Angli.
Bëhet me dije se këngëtari e vizitonte shumë shpesh edhe kur ai vuante dënimin në burgun e Fushë-Krujës. Vetë këngëtari nuk është prononcuar në lidhje me këtë miqësi me viktimën, por veprimi i tij i fundit duket se i tregon të gjitha.
Reperi i famshëm ka publikuar një këngë mbrëmjen e djeshme, ku në fund të videos shkruan një dedikim për Billën.
“R.I.P Daja & Fox”, lexohet në përfundim të videos të këngëtarit, i cili mendohet të jetë një atribut për Billën.
