Mbrëmjen e djeshme, Brukseli u tmerrua nga të shtëna armësh, nga të cilat mbeti i vdekur një 38-vjeçar shqiptar.
Ditën e sotme, është zbardhur identiteti i viktimës dhe bëhet fjalë për Ardit Spahiun nga Elbasani, i cili u ekzekutua me 8 plumba.
Spahiu ka qenë i arrestuar më parë për vrasjen e 52-vjeçarit, Gëzim Alikaj në Elbasan në vitin 2010, ndaj edhe policia belge dyshon se vrasja e 38 vjeçarit mund të jetë bërë për motive hasmërie.
Dyshohet se Spahiu qëndronte ilegalisht në Belgjikë. Në vendin e ngjarjes, prokuroria kërkoi një ekspert të balistikës dhe një mjek ligjor si dhe një kontroll laboratorik nga policia federale dhe një gjyqtar ekzaminues, konfirmon Sarah Durant, zëdhënëse e zyrës së prokurorit publik të Brukselit.
Policia dhe ekspertët po mbledhin provat në vendin e ngjarjes, me qëllim kapjen e autorit të krimit.
