Shërbimi i Kontrollit të Brendshëm në Burgje ka arrestuar dy punonjës të burgut të Reçit, si të dyshuar për përfshirje në korrupsion. Punonjësit e arrestuar janë shtetasit Mario Laloshi dhe Arnaldo Hoxha, të cilët janë pezulluar nga detyra vetëm pak kohë më parë.
Arnaldo Hoxha dhe Mario Laloshi, që të dy me funksionin specialist-psikolog në sektorin e çështjeve shoqërore në burgun e Reçit në Shkodër, u pezulluan nga detyra dy ditë më parë. Vendimi i Ministrit të Drejtësisë, Ulsi Manja, erdhi pas denoncimit në emisionin “Stop” në Tv Klan të një rasti korrupsioni, ku këta persona kanë marrë para nga një i dënuar në këmbim të disa shërbimeve.
“Ministri Manja e firmosi urdhrin për pezullimin e të dy punonjësve dhe fillimin e hetimit administrativ ndaj tyre. Ndërkaq, për në IEVP Reç janë nisur grupet e inspektimit nga DPB dhe SHKBB për të zbardhur rastin”, thuhet në një njoftim të Ministrisë së Drejtësisë.
Hoxha dhe Laloshi u denoncuan nga kamerat e fshehta të emisionit investigativ “Stop” duke marrë para në këmbim të disa shërbimeve. Hoxha mori 20 mijë lekë në këmbim të ndikimit të tij në raport-vlerësimin e sjelljes së të burgosurve. Nga ana tjetër, Laloshi ishte përgjegjës për kontaktet e të burgosurve me familjarët.
