Zëdhënësi i Presidentit Ilir Meta, Tedi Blushi ka reaguar ashpër ndaj kryetarit të Komisionit të Ligjeve, Ulsi Manja.
Përmes një postimi në Facebook, Blushi e cilëson Manjën si ‘zëdhënësin e Dosjes së Dibrës’. Blushi e fton Ulsi Manjën të jetë nesër i pranishëm në konferencën për shtyp në Presidencë.
Zëdhënësi i presidentit shton se në konferencë ai mund të pyesë për çfarë të dojë, teksa e siguron se deri në mars ai do t’i bashkohet njerëzve në protestë.
“Ftohet zëdhënësi i Dosjes së Dibrës të marrë pjesë nesër në konferencën e radhës për shtyp në Presidencë, e madje të bëjë pyetje dhe debat para gazetarëve, jo vetëm si kryetari i Komisionit të Ligjeve dhe lider i reformën në drejtësi, por dhe si filozof i paparë që u shfaq sot. Me qetësi dhe drejtësi!
Deri në 2 mars jemi të bindur se do bashkohesh me mbarë popullin kundër grushtit të shtetit. Se faktet e reja tronditëse do bëjnë të harrohet dhe Dosja 184. Presidenti të pret nesër në Presidencë, t’i dëgjojë këshillat e tua nga afër. Ai do të trajtojë me më shumë përulësi, se sa e trajtove ti në Komisionin Parlamentar. Të presim!”, shkruan ai.
Kujtojmë se më herët, Ulsi Manja reagoi ndaj deklaratave për protesta të presidentit Meta, duke u shprehur se ai po bëhej gazi i botës.
“Zoti President mos e dëgjo Ilir Metën dhe ti zoti Ilir mos e çmend Presidentin! Gjeni gjuhën e bashkëpunimit sa më parë se mirë u bëtë gazi i botës, po po e bëni edhe Shqipërinë gazin e botës! Ju lutem, takohuni dhe ulni gjakrat, mos u kacafytni brenda të njëjtës kokë. Duhet qetësi”, shkroi ai.
