Arrestohet shqiptari i dytë nga katër që u arratisën nga qelitë e paraburgimit në Greqi ditën e djeshme.
Sipas mediave greke, shqiptari u arrestua në lagjen “Botaniko” në Athinë. Mësohet se i riu sapo ka parë policinë, ka tentuar të largohet, dhe gjatë arratisjes u plagos lehtë në këmbë.
Kujtojmë se më herët, gjatë mëngjesit, përfundoi në pranga një tjetër shqiptar, ndërsa dy mbeten ende në kërkim. Ata akuzohen për grabitje dhe vrasje në tentativë, ndërsa njëri prej tyre rezulton i dënuar me burg të përjetshëm.
Shqiptarët ndodheshin përkohësisht në burgun e Koridhallos pasi priteshin të transferoheshin në një tjetër burg.
