Kryeministri Edi Rama ka reaguar menjëherë pas arrestimit të personit të pestë, lidhur me grabitjen në Rinas. Me anë të një postimi në Twitter, ai citon se tashmë po ngushtohet rrethi i keqbërësve, kjo falë punës profesionale të policisë.
“Arrestohet edhe një autor tjetër i grabitjes së Rinasit, duke e ngushtuar më tej rrethin e keqbërësve falë punës intensive dhe profesionale të Policisë së Shtetit. E cila po provon se ka kaluar në një nivel të ri fuqie goditëse ndaj krimit, duke folur përditë me rezultate konkrete”, shkruan Rama.
Po kështu, policia bën me dije se në mesnatë është kapur shtetasi me inicialet E.P., banues në Krujë, i dyshuar si një prej autorëve të kësaj ngjarje.
“Në vijim të veprimeve të kryera nga një grup i posaçëm hetimor për zbardhjen e ngjarjes së datës 09.04.2019, në aeroportin e Rinasit, ju informojmë se mbrëmë në mesnatë është kapur dhe ndalur shtetasi E.P., banues në Krujë, i dyshuar si një prej autorëve të kësaj ngjarje.
Materialet proceduriale i kaluan Prokurorisë pranë Gjykatës së Shkallës së Parë për Krime të Rënda Tiranë, për veprën penale të “Vjedhjes me armë të kryer në bashkëpunim” në kuadër të “Grupit të Strukturuar Kriminal”, ”Mbajtjes pa leje e armëve dhe municioneve luftarake” “Vrasje e Punonjësve të Policisë”, e kryer në bashkëpunim, e mbetur në tentativë.
