Kancelarja gjermane, Angela Merkel, gjatë një bisede telefonike me presidentin turk, Recep Tayyip Erdogan, i kërkoi këtij të fundit përfundimin e menjëhershëm të sulmit ushtarak në Siri. Lajmi është konfirmuar për mediat vendase nga një zëdhënëse e qeverisë.
“Pavarësisht interesave të ligjshme të sigurisë së Turqisë, sulmi po kërcënon zhvendosje të mëdha të popullsisë lokale, destabilizim të rajonit dhe ringjalljen e organizatës ekstremiste të Shtetit Islamik”, deklaroi zëdhënësja.
Turqia nisi pak ditë më parë operacionin ushtarak në veri të Sirisë, duke thënë se synon ekstremistët e Shtetit Islamik dhe milicitë kurde, por aleatët perëndimorë e kritikojnë veprimin e Ankarasë.
