Mosmarrëveshja për të drejtat e pasurive nënujore, ka bërë që Turqia dhe Greqia të vendosin trupat e marinës në rajon. Greqia dhe Turqia kanë qenë në mosmarrëveshje për dekada mbi kufijtë detarë, por zbulimet e fundit të gazit natyror dhe planet e shpimit nëpër Mesdheun Lindor, kanë përkeqësuar tensionet.
Ministri i Mbrojtjes së Turqisë, Hulusi Akar, ka deklaruar se 18 ishuj janë armatosur nga Greqia në kundërshtim me marrëveshjet. Ai ka thënë se kjo përshkallëzon tensionet dhe eliminon dialogun e ndërsjelltë.
“18 ishuj janë armatosur nga Greqia, në kundërshtim me marrëveshjet. Kjo përshkallëzon tensionet, eliminon dialogun e ndërsjelltë”, tha Akar.
Po sipas tij, Turqia është pro dialogut. Në të njëjtën kohë apelon ndaj Greqisë që të lërë mënjanë sjelljet provokative, përshkallëzuese dhe rritjen e tensioneve.
“Turqia është gjithmonë pro dialogut, dhe dëshiron që problemet këtu të arrijnë zgjidhje politike me mënyra paqësore. Sipas qasjes sonë, provokimi, nxitja, tensionet, nuk kanë dobi për askënd veçanërisht për Greqinë”, deklaroi ministri Akar.
Duke kritikuar qëndrimet e presidentit, Emmanuel Macron, ministri Akar tha se: “Populli grek s’duhet të rrëmbehet nga përpjekjet e Macronit, s’duhet të bëhet meze për operacionet e Macronit për vetëshpëtimin e tij.
Duket shumë qartë se politika e Macronit ka falimentuar. Për të mbuluar këtë, ai po përpiqet që të kapë disa role në mënyrën e tij”.
