Presidenti amerikan, Donald Trump i ka dhënë 30 ditë kohë OBSH-së për të ndryshuar disa ‘pretendime’ që organizata ka mbi koronavirusin.
Sipas Trump, nëse OBSH nuk reflekton atëherë ajo do të humbasë përgjithmonë mbështetjen financiare të SHBA.
Ai i ka dërguar një letër Organizatës Botërore të Shëndetësisë duke i kritikuar ashpër qëndrimet e saj lidhur me pandeminë, si dhe marrëdhënien me Kinën.
“OBSH ka bërë disa herë pretendime mbi koronavirusin që kanë qenë ose të pasakta ose të shtrembëruara”, shkruante Trump në letrën me katër faqe për drejtorin e përgjithshëm të OBSH, Tedros Adhanom Ghebreyesus.
Por disa ekspertë kanë thënë se kërkesat e Trump janë të papërshtatshme.
“Presidenti Trump nuk e kupton atë që OBSH mund ose nuk mund të bëjë. Ajo është një agjenci teknike, normative që duhet të ulë në tryezë vendet anëtare. Nëse ai beson se ata duhet të kenë më shumë fuqi, atëherë këtë duhet t’ia japin vendet anëtare. Kjo letër është shkruar për të devijuar fajin. Kina dhe SHBA por zihen si dy prindër të divorcuar, ndërsa OBSH është në mes tyre duke u përpjekur të mos mbajë anë”, tha Devi Sridhar, Profesor i Universitetit britanik të Edinburgh.
Trump vijon të bëjë fajtore Kinën për përhapjen e koronavirusit, i cili deri më tani i ka marrë jetën mbi 321 mijë personave në të gjithë botën.
