Presidenti i SHBA-ve, Donald Trump ka deklaruar se Japonia mund të godasë Korenë e Veriut me pajisje ushtarake të blera nga Amerika.
Këtë deklaratë, Trump e bëri pas vizitës së tij të parë zyrtare në Japoni, ku u takua me kryeministrin e vendit, Shinzo Abe.
Gjatë konferencës së shtypit, Trump deklaroi se Japonia do të pajiset me një sasi të madhe të pajisjeve ushtarake nga SHBA-të.
Duke iu referuar Koresë së Veriut, Trump tha se Japonia mund ta godasë atë nga qielli, gjë që sipas tij do të siguronte vende pune për amerikanët dhe siguri për Japoninë.
Ndërkohë, kryeministri japonez tha se shteti i tij duhet të përmirësonte sasinë dhe cilësinë e aftësive të saj mbrojtëse, duke pasur parasysh situatën “mjaft të vështirë” krijuar nga Koreja e Veriut.
Ai theksoi se mbrojtja e raketave bazohej në “bashkëpunimin ligjor” ndërmjet Japonisë dhe SHBA-së.
Nuk është e qartë nëse një marrëveshje ushtarake është nënshkruar gjatë udhëtimit të Trump, por në shtator Trump njoftoi në Twitter se ai do të lejonte shitjen e pajisjeve ushtarake në Japoni dhe Korenë e Jugut.
Japonia nuk ka një ushtri bazë, por në vend të saj mban atë që e quan një forcë vetë-mbrojtëse, nën kushtetutën pacifiste të pasluftës.
Të dy udhëheqësit gjithashtu riafirmuan lidhjet e tyre dhe u zotuan të “qëndrojnë kundër kërcënimit të Koresë së Veriut”.
Trump po viziton Japoninë si pjesë e turneut të tij të parë në Azi si president i SHBA. Ai do të vizitojë Korenë e Jugut, Kinën, Vietnamin dhe Filipinet në javën e ardhshme./ Tirana Today
