Presidenti i SHBA-ve, Donald Trump, ka fajësuar protestat anti-racizëm të grupit ‘Black Lives Matter’, shtetin e Meksikës dhe të rinjtë për shtimin e rasteve me koronavirus në vend.
“Shtimi i grumbullimeve në festën e ‘Memorial Day’ dhe të rinjtë që mblidhen afër në bare e vende të tjera, janë faktori kryesor i përhapjes. Ne kemi gjithashtu një kufi prej 2000 miljesh me Meksikën dhe ju e dini mirë që rastet po shtohen edhe në Meksikë, ky është një problem i madh për Meksikën”, tha Trump.
Sipas analistëve të huaj, grupet që zgjodhi Trump për të fajësuar për shtimin e rasteve, tregojnë për strategjinë e tij elektorale.
Ata kapen me faktin se Trump nuk përmendi njerëzit që nuk mbajnë maska në vende publike, apo kur vizitojnë miqtë e familjarët.
Presidenti amerikan nuk përmendi barrën që koronavirusi ka shkaktuar mbi shërbimet shëndetësore, por vijoi me ankesat sesi njerëzit po testohen në SHBA.
