Mbrëmjen e djeshme, një mjeti në Vlorë i është vënë tritol, teksa ishte parkuar në lagjen “Hajro Çakërri” të qytetit. Poshtë makinës, në pronësi të shtetasit S.Binajt ishte vendosur 600 gram tritol. Burimet bëjnë me dije se tritoli ishte vendosur në anën e shoferit, me magnet të fortë që të mos binte nga vendi ku edhe ishte projektuar që të qëndronte.
Bashkëshortja e shoferit ka qenë ajo që ka pikasur një dritë të kuqe, ndërsa kanë bërë denoncimin tek forcat xheniere. Këto të fundit kanë bërë të mundur shpërthimin e komanduar rreth orës 03:00 të mëngjesit të 22 nëntorit.
Mendohet se lënda plasëse është vendosur prej ditësh në mjet, por nuk ishte shpërthyer pasi automjeti tip ‘Benz’ kohët e fundit përdorej nga bashkëshortja dhe fëmijët e S.Binajt.
Në dëshminë e tij në Komisariatin e Vlorës, S.Binaj ka thënë se nuk dyshon tek asnjë person, pasi nuk ka konflikte me askënd.
