Nafta po tregtohet e qëndrueshme në sesionin e sotëm, ndërkohë që investitorët po presin të dhënat mbi rezervat e naftës në SHBA që publikohet më vonë gjatë ditës së sotme. Analistët parashikojnë një rënie të mëtejshme të rezervave gjatë javës së kaluar, por rritja e infektimeve me variantin Delta po kufizon fitimet, pasi mund të dëmtojë rimëkëmbjen e ekonomisë globale.
Nafta Brent e Londrës po tregtohet në rreth 75 dollarë për fuçi, ndërsa nafta Bruto amerikane po tregtohet në rreth 74 dollarë për fuçi. Analistët parashikojnë rënie të rezervave në SHBA për të tetën javë me radhë. Ditën e sotme publikohet raporti jozyrtar nga Instituti Amerikan i Naftës, ndërsa të mërkurën publikohet raporti zyrtar nga Departamenti për Informimin mbi Energjinë.
Megjithatë, humori vijon të jetë pozitiv pasi tregjet e aksioneve prekën nivelin më të lartë historik në sesionin e kaluar, pavarësisht rritjes së infektimeve me Covid-19 në shumë vende të botës. Edhe Organizata Botërore e Shëndetësisë paralajmëroi se varianti Delta po bëhet dominant dhe shumë vende duhet të marrin mjaftueshëm doza të vaksinave për të siguruar punonjësit e shëndetësisë.
Ndërkohë, OPEC+ po bën progres në arritjen e një marrëveshje mes Arabisë Saudite dhe Emirateve të Bashkuara Arabe mbi kuotat e prodhimit./SCAN
