Një ngjarje e rëndë u raportua tre ditë më parë në Fier, ku një fëmijë tre-vjeçar kishte ndërruar jetë në kopsht. Nga hetimet paraprake dyshohet se fëmija ka humbur jetën aksidentalisht. Gjatë dëshmisë në polici, edukatorja ka thënë se fëmija ka mbetur i varur tek varësja e rrobave. Burime nga policia thanë se “tre-vjeçari ka tentuar të marrë çantën dhe i ka ngecur kapuçi i xhupit në varëse, e për pasojë është mbytur”. Familjarët e 3-vjeçarit sot janë mbledhur para Prokurorisë, për të kërkuar drejtësi.
Nëna e djalit të mitur rrëfen mes lotësh se ka qenë edukatorja e kopshtit që e ka telefonuar, për ti dhënë lajmin tragjik. Sipas nënës së viktimës, edukatorja i kishte thënë se djali ishte përmendur, ndërsa më pas doktorët e kishin njoftuar se i mituri ndërroi jetë.
“Edukatorja më ka gënjyer. Më ka marrë mua të parën në telefon, më tha është mbytur me litar të bluzës, është në gjendje të mirë dhe është përmendur. Në momentin që shkova në spital, më thanë është futur në sallë të operimit. Pastaj doktori më tha fëmija ka ardhur pa jetë këtu. Na thanë ka kamera sigurie, por kur shkuam nuk kishte. Djali 15 kg, nuk ka mundësi të mbytej nga varësja. Kërkoj drejtësi për shpirtin e Noas tim”, tha nëna mes lotësh.
Pavarësisht ngjarjes së rëndë, kopshti vijon të jetë i hapur.
