Ish-kreu demokrat, Sali Berisha, shpërtheu në sulme të forta ndaj Bashës duke kërcënuar se do të mbledhë pas vetes të gjithë besnikët për të futur në shinat e demokracisë partinë. Madje flitej se ai do të dilte dhe me një grup parlamentar më vete. Por dje, Berisha u shfaq shumë ndryshe. “Grupi parlamentar i Partisë Demokratike është grupi im. Në asnjë mënyrë nuk do të krijoj tjetër”, deklaroi ish-kryeministri.
Kur u pyet se cila do të jetë lëvizja e tij e radhës, Berisha u përgjigj: “Lëvizjet e mia do t’i ndiqni me radhë”. Në mbrëmje Berisha ishte në një emision televiziv, ku u pyet dhe për surprizat që mund të vijnë nga SPAK.
“Unë nuk i njoh vetes asnjë imunitet, asnjë lloj mburoje për çdo çështje që ka të bëje me mua apo fëmijët e mi që nga 1990 deri më sot, asnjë. Jam i hapur për çdo lloj hetimi mbi tokë. Nëse ecim me prova të sajuara, të kthehet bumerang. Kam kërkuar transparencë dhe vetëm kaq. Kërcënimet që kanë përcjellë për fëmijët e mi, nuk kanë asnjë vlerë”, tha ai.
Ditën e djeshme, Berisha hyri në Kuvendin e Shqipërisë si deputet i pavarur. Tre deputetë u panë me të, të cilët e shoqëruan gjatë gjithë ditës që nga shtëpia deri në Parlament. Bëhet fjalë për deputetët demokratë; Flamur Noka, Edi Paloka dhe Tritan Shehu, të cilët së bashku me Berishën hynë në Parlament.
Ndryshe nga çfarë e kemi parë më herët, ulësen në sallën plenare Berisha e gjeti pranë kryetares së LSI, Monika Kryemadhi, në rreshtin e parafundit, larg grupit parlamentar të PD. /Tirana Today
