Kryetari i PD, Lulzim Basha, pas daljes nga Prokuroria e Krimeve të Rënda ku ka dëshmuar para prokurorëve për çështjen “Toyota Yaris”, tha në një prononcim për mediat se Balla sot duhet të ishte në pranga.
Pas rreth 90 minutash në Prokurorinë e Krimeve të Rënda, Basha ka deklaruar për median se ka dhënë gjithë informacionin e plotë lidhur me çëshjen për të cilën u thirr për të dëshmuar para prokurorëve belgë për çështjen “Toyota Yaris”.
Ai iu rikthye sërish akuzave të parashtruara më herët, ndërsa fajësoi kryeministrin Rama si personi që merret me pastrimin e parave, drogës dhe krimit.
“Dhashë informacionet që kisha për këtë çështje. Edhe më shumë se kam bërë të njohura në publik. Sot në pranga duhet të ishte Taulant Balla.
Pastrimi i parave të drogës dhe krimit është rreziku kryesor që i kanoset sot Shqipërisë. Është rrezik politik, ekonomik, shoqëror, dhe për stabilitetin e vendit.
Edi Rama dhe qeveria e tij janë vënë në shërbim të pastrimit të parave të pista të krimit. Të gjitha koncesionet dhe projektet e qeverisë janë pastrim parash të drogës dhe të krimit. Projekti i stadiumit është pastrim parash. Projekti i Teatrit është pastrim parash. Projekti i Unazës është pastrim parash”, tha Basha.
