Burime nga grupi hetimit kanë hedhur dritë mbi shumën e parave të bllokuara dje në Portin e Durrësit, e cila po transportohej nëpërmjet dy makinave tip “Toyota”. Bëhet fjalë për 3.470 mijë euro, e në sajë të analizës që u janë bërë, nuk rezultojnë false. Paratë ishin ndarë në katër thasë gjithsej dhe gjendeshin të shpërndarë në dy prej makinave “Toyota”. Dy makinat ishin të ngarkuara në një kamion së bashku me shtatë makina të tjera.
(Në total 9 makina, 7 prej të cilave ‘Toyota’, një ‘Opel’ dhe një ‘Alfa Romeo’). Makinat së bashku me kamionin që i transportonte janë bllokuar në orën 15:00 në Portin e Durrësit, ndërsa ato kishin zbarkuar aty me tragetin e linjës Ankona-Durrës, në orën 10:00 të paradites së djeshme.
Hetimet
Mjetet vinin nga Belgjika, kaluan tranzit ne Itali dhe u bllokuan në Durrës pas njoftimit të Interpol Romës. Dyshimet e para janë se paratë janë fituar me aktivitet kriminal në Belgjikë, e ndërsa tashmë kanë nisur hetimet për të gjetur porositësin dhe personat që i kanë dërguar.
Autoritetet shqiptare të informuara
Burime thanë për gazetën “Panorama” se Interpol Roma kishte përcjellë informacionin te homologët e tyre në Shqipëri dhe sapo mjetet e ngarkuara në trajler mbërritën në Portin e Durrësit, autoritetet shqiptare ndërhynë. Gjatë kontrollit u zbulua se në dy prej nëntë mjeteve që ndodheshin në kamionin që i transportonte, ndodheshin të fshehura në thasë shuma e madhe e eurove.
Policia në bashkëpunim me Krimet e Rënda kryen sekuestrimin e parave dhe mjeteve që ndodheshin në trajlerin me targa AA 120 SP, i cili gjithashtu u sekuestrua për llogari të hetimeve. Sakaq, Policia dhe Prokuroria për Krimet e Rënda nisën edhe hetime intensive për zbulimin e personave apo grupit kriminal që po transportonte në mënyrë të paligjshme sasinë rekord të parave.
Identifikimi i personave
Nga hetimet fillestare janë identifikuar katër persona të përfshirë, ndërsa tre prej të cilëve janë shoqëruar dhe ndodhen të ndaluar në polici, ku dy prej tyre janë shoferët e kamionit që solli makinat ku u gjetën eurot. Klevis Lika është pronari i kamionit me targë AA 120 SP – AFR 559, ndërsa babai i tij, Edi Lika, është pronari i kompanisë së transportit të automjeteve.
Pak pas verifikimit të pranisë së një shume të madhe parash në dy makinat “Toyota”, policia ka ushtruar kontroll dhe në banesën e pronarit të firmës që ka bërë transportin e makinave për në Shqipëri, por nuk është gjetur asnjë gjë e dyshimtë. Ndërkohë, operacioni për zbulimin e parave është realizuar nga autoritetet shqiptare, në bashkëpunim me palën italiane. (Burimi: Panorama)
