Ish-kryeministri Sali Berisha i është përgjigjur për herë të parë akuzave të Bamir Topit, të bëra përmes librit të tij të sapodalë në treg ‘Nocturn’.
Topi deklaroi mes të tjerave se një helikopter ushtarak i bazës së Farkës, ishte ulur mes ullishtave, në oborrin e shtëpisë së ish-Presidentit, ç’ka kishte ngjallur panik te familjarët dhe banorët përreth. Sipas rrëfimit të Topit, kjo ngjarje e ndodhur në vitin 2013, u zbardh 5 vjet më vonë.
I pyetur nga gazetari Blendi Fevziu për këtë, Berisha e argumentoi me faktin se Bamir Topi ka patur psikozën e fobisë. Me tone ironike, Berisha shtoi më tej se kreu i shtetit duhet të sigurohet, ndërsa i uron Topit ti dalë frika që e ka mbërthyer.
“Çdo njeri që e lexon atë, konstaton se ai ka patur psikozën e fobisë. E frikës, pa diskutim në atë situatë që të gjitha institucionet kanë patur përforcime të mbrojtjes. E ka shkruar me dorën e tij që ka psikozën e fobisë. Çfarë i them unë tjetër gjë, çfarë thonë lidhet për sigurinë e jetës së tij. Ato që them unë, nuk i heq asnjë fjalë unë, por ligjet thonë se kreu i shtetit duhet të sigurohet. Uroj që t’i ketë dalë frika këtij njeriu”.
